مراحل اﻹختبار الشفوي لسلك حراس اﻷمن 2016

↩مراحل الشفوي 2016 ↪ الخاصة بالكتابي10/7/2016
......
الاخوان المقبلين على شفوي انشاء الله غادي نشرح ليكم كيف تمر اجواء ايام شفوي
◀اليوم الاول :
7 صباحا تكون واقف امام المعهد كتجمعو كيدخلوكم 2-2 لساحة المعهد من بعد كيجيبو لائحة كايعيطو ليكم بسمياتكم وكل واحد قال حاضر كايعطيوه رقم ترتيبي خاص بيه ديك رقم مخصكش تنساه لان غادي تولي معروف بديك رقم فقط طيلة الاختبارات المهم من بعد مايساليو كتكونو فالمجموع 200 كاتمشيو لقاعة كبيرة (لونفي) كيقسموكم كل 100 فقاعة من بعد كتجي عندكم طبيبة وكيفرقو عليكم واحد وراق فيها اسئلة كتخص الحالة صحية ديالك وديك طبيبة كتشرح ليكم كولشي بالتفصيل كتهضر ليكم على جهاز التنفسي والمفاصل بحال هكا كاتجاوبو ب نعم او لا ديكشي ساهل وفديك القاعة كل صف فيه 10 مترشحين وكل صف كيكون مكلف بيهم مفتش متدرب فالمعهد هو لي كيوجهم المهم كتخرجو من ديك القاعة كايديوكم المستودع تبدلو حوايجكم وتلبسو حوايج رياضة (من الاحسن ديكشي خفيف بحال شورط ...) كتخلي حوايجك تما وكتهز الملف ديالك وكتمشي ديرو صف حدا العيادة 100 الأولين فترة صباحية كتدخلو 1-1 لبيرو الاول كتعبرو طول والوزن والضغط وتمشيو لبيرو تاني 1-1 كيقلبو ليكم العينين ودير تجارب د نظر عن بعد كتسالي كتمشيو لبيرو تالت طبيب د اسنان كيقلب ليك اللحم واش مريض (واش كنتي كتستعمل الكالة ...) كتسالي كتمشي المستودع كتحيد حوايج تبقا غير (سليب) كيكون عندك الملف ديالك كتدخل عند الطبيب العام كتعطيه الملف كيراقب ديكشي ديال (تخطيط القلب و راديو صدر...) من بعد كيقولك نعس كيقلب بديك سماعة طبية صدرك ظهرك كرشك كيقلب ليك رجليك ركابيك يديك واش نورمال كايقولك وقف تمشى شوية طلع وهبط و كيقولك واش الخصيتين مزيان وكيقولك حيد نشوف هههه المهم كتسالا المهمة ديال طبيب كتلبس حوايجك كتخرج كتبقا تسنا حتا تجمعو كاملين گروب ب 10 ديك مفتش كيطلعكم لقاعات شفوي فيها لجان كتمشي ديرو صف وكدخلو 1-1 لجنة فيها 3 كيعيطو كدخل كيطلب منك البطاقة وكيقول ليك اجلس المهم هنا نعطيكم نصائح لي خاصك طبقهم ضروري ( المهم منين تدخل دخل بشوية قل سلام عليكم يطلب منك تجلس انت فهاد اللحضة كيطبق عليك شفوي خاصك تكون واتق من نفسك اجلس وانت عادي متبقاش تشوف فالارض او تبقى تزعزع رجليك وتلعب بيديك خليك مركز ومنضبط المهم ما خاصش تبان ليهم مرتبك واي واحد هضر معاك شوف فيه ماتحشمش ومنين تهضر كن واتق فراسك الصوت ديالك يكون واضح ماشي تهضر وانت مخلوع وغير بشوية لان كيركزو بزاف على هادشي اما الاسئلة كتبقى شكلية واخا ما تفوقش فشي سؤال 1 او 2 ماشي مشكل الاهم انك تبان ليهم منضبط وعندك شخصية قوية ) الاسئلة عادية متل عاصمة البرتغال اسم وزير داخلية ... الاهم اي سؤال طرحوه عليك جاوب فبلاصة وشي سؤال صعيب قل ماعرفتش بلا ماتبقى تفتف عليهم واقيلا كذا واقيلا صافي من بعد تسالي غادي يعطيك البطاقة وتمشي غادي يهبطوكم لساحة الحلبة للجري على ماتجمعو كاملين كيجيو ناس لي مكلفين بالرياضة كل 20 كيجريو مسافة 1500 متر ف 7دق المهم ماخصش تفوت المدة ونصيحة (الى كليتي قبل جري حاول تاكل وتشرب غير شوية لان كتكون شمس وقدر تقيأ وحاول منين توصل رتاح وانت فبلاصتك واقف ماشي تموت ليهم تما ههه) المهم لهنا كتكون ساليتي اختبارات اليوم 1 من بعد كتبقا تسنا على ما يساليو جميع المترشحين كتوقفو فساحة وكتجي لجنة بلوائح ناس لي نجحو فاليوم 1 كيعيطو بالارقام وهنا لي متوفقوش كايسيفطوهم بحالهم كيعلموهم ديك ساع باش بلا مايجيو يدوزو الاختبارات اليوم 2 صافي تقصاو ولي نجحو عندهم موعد غدا يمشيو يرتاحو حيت عندهم بسيكو فاليوم 2 وخاص تكون مرتاح وفي قمة التركيز .
-----------------------------------------------------------------------------------------------
◀اليوم التاني :
كتكون 7 صباح فباب المعهد وكتجيب معاك ستيلو والبطاقة و استدعاء المهم كتدخلو لساحة كتوقفو كايجي عميد ولجنة معاه كايعيطو بالارقام من 0 الى 0 يمشيو لقاعة كيقسموكم فكل قاعة كيجيو 2 ضباط كيفرقو عليكم وراق تكتبو فيهم اسماءكم ورقمكم ورتبكم ... من بعد يعطيوكم كتاب فيه شي 80 ورقة فيه اسئلة كتخص شخصيتك كيف داير متل يعطيوك انت مع او ضد اعطاء الصدقة للمتسولين هل انت سريع الانفعال وبحال هكا .... من بعد كيجمعو ديكشي وكيفرقو عليكم كتاب فيه شي 60 ورقة وكل ورقة فيها سؤال متل عبارة عن كادر فيه اشكال هندسية وناقص شي جزء وكايعطيوك اختيارات خاصك توضع علامة على الجزء المطلوب المهم ساهل كيعتمد على سرعة وحسن الاختيار المدة الاختبار 30 دقيقة كتسالي كتخرج تسناو اختبار البسيكو من بعد كدخلو 1-1 لجنة فيها طبيب و طبيبة وشي وحد اخرين المهم نصائح البسيكو (خاصك دخل ماتخافش ماتدهش وماتكدبش صافي عادي اي حاجة قالو ليك جاوب بصراحة لان هما يحصلوك لان ديك ناس هاديك هي خدمتهم كيزربو عليك وكل واحد كيسول من جيها وبعض الاسئلة كيعاودوها غير بالفن وينسقو مابين الاجوبة وديك الورقة لي جاوبتي فيها من قبل كتكون قدامو خاص تكون مامتناقضش فالاجوبة يعني تكون صريح معاهم) المهم كتسالي مع بسيكو كيعطيوك بطاقة ديالك صافي هنا كينتهي الاختبار شفوي كتخرج كيجمعوكم فواحد القسم من بعد كيخرجوكم الباب كيقولولكم صافي حتا نوليو نعيطو ليكم وهادشي ليكاين وكنتمنى نكون توفقت وفهمتو مزيان جميع المراحل والاختبارات فشفوي والله يسهل على الجميع .
ملاحظة هامة : لست صاحب المقال ، وهو منقول من صاحبه الأصلي: صفحة جديد إلتحاق حراس اﻷمن 2015 على موقع التواصل الاجتماعي الفايس بوك.